ياريت اتعلم البرمجة!

اغلبكم من يقرأ التعليقات يلي تنكتب على اي مقال او موضوع متعلق بامور برمجية، تلاحظ عادة هذي العبارات:

- اتمنى اعرف
- شي حلو، ياريت اعرف
- حلو، بس ما عندي لغة
- خرافي، بس ما ادري منين ابدأ
وهكذا ..

تعال خلي افهمك شي انتَ مفاهمه لحد هاللحظة ::)
يا خي حد قال اليك الكود شي صعب؟

عندك علم تقدر تبني برنامج آله حاسبة خلال دقايق لا وايضا تضيفلها مميزات اكثر خلال دقايق اكثر؟

طيب ما سألت نفسك هذي كفشه الخرابيط والرموز والارقام والاحرف شنو هيَ؟

خلي اقلك مشكلتك شنو بالضبط،

شوف الصورة هذه، انتَ تريد تكون بهذاك الكرسي يلي يقعد عليه المبرمج، وتريد بجانبك كومبيوترات مليانه شاشات وهوايه برامج مفتوحه ومستلم عروض وشغل ومندمج بغير عالم .. مجرد ما قعدت من الحلم مالتك عفت كل شي ورحت!

طيب شنو رأيك اسهل الك الموضوع؟
لا تفزع من تسمع هذي المصطلحات "برمجة، كود، برمجية، اكواد، لغات، وغيرهم" .. تعال ابسطها الك

الكود: هوَ عبارة عن مجموعة قصيرة من حروف، ارقام، رموز

ممكن يجي بواحد من هالأشكال:

• - حروف وارقام
• - حروف ورموز
• - ارقام ورموز

لو مطي يركب مطي مارح يجي بغير صيغة بعد ابداً، بكل العالم ماكو غير صيغة تره!

طيب هسه فهمت الكود، شلون رح تعرف وتفهم هذا وين تكتبه ومنين تحفظة؟

الكود: مثل طفل ديتعلم عربي بالضبط
انتَ طفل بالنسبة للكود وكاعد دتتعلمه من الصفر،

الفرق .. تخيل ورقة مكتوب عليها كلام، الكلام هذا اذا حفظتة فقط رح تفشل .. لازم تفهمه حتى تعرف شلون تربط وتكتب

مثلاً،
اذا تريد تكول "Hello World" عن طريق الكود رح تكتبها كالتالي

Hello World
لكن ماكو شي هنا رح ينفهم ابداً بالنسبة للكومبيوتر وللشيء يلي تريد تبني!

لذلك اخترعوا شي اسمة "لغة برمجة"
لغة البرمجة هوَ المكان يلي رح تكتب بي الكلام يلي تريده على أساس القاعدة مالتهم،

الكلام يلي تريده مثل Hello World
القاعدة مالتهم: هيَ الطريقة يلي تخلي بيها البرنامج يفهم انتَ شدتكول

مثال، بلغة بيسك - Basic رح يكون كتابة الكود كالتالي:

"PRINT "Hello World
END

هاي هيه كملت!

انتَ هنا كلت للبيسك Print - اطبع
وخليت علامات ترميز " " بين الكلام يلي يطبعة
وراها كتبت End - انتهى

الموضوع بسيط دتشوفه، لا تنسى لغة بيسك قديمة جداً من عام 1964 تم انشاءها واحنا حالياً 2020 لذلك مهم تتعلم لغة البرمجة يلي تتوافق ويه متطلباتك

شلون تعرف يا لغة تريد؟
قسم الموضوع حسب اهدافك .. ابدي اول شي فكر انتَ واهسك بشنو!

مثال،
اني واهسي بالـ iOS، معناها لازم اتعلم لغة متخصصة بالـ iOS قدر الامكان حتى ما اشغل جزء من عقلي بحفظ وفهم اكواد ما احتاجهم ..

إذن، توجهك رح يروح على عدة لغات مثل Swift وكذلك Objective C ..

شلون تعرف ياهو افضل، سويفت لو Obj-C؟
رح اكتبلك مثال وانتَ رح تفهم المفروض ياهو افضل

رح اكتبلك Hello World باللغتين

• - Swift:

import Swift
("print("Hello World

انتهى

• - Objective C:

()int main
{
;("NSLog(@"Hello World
;return 0
}

انتهى

الثنين رح ينطوك نفس النتيجة، لكن لاحظ شكد فرق مخيف بين الثنين!!

طالما فهمت انو سويفت افضل من غيرها، هنا لازم تعرف حتى بحجم التطبيق سويفت اسرع واقل حجم واسهل بهوايه بشكل متتخيله، حرفياً استخدام سويفت ممتع

يعني بدل ما تكول بالعربي:
السلام عليكم ورحمة الله وبركاتة
تكدر تكول
السلام عليكم

نفس النتيجة بالضبط، لكن اختصرها هواية

مارح اطول عليك اكثر،
طالما قريت لهنا معناها مهتم تتعلم .. عاشت ايدك ::)

شتنتظر لعد؟
افتح Udemy او اي موقع وابحث عن كورسات باللغة يلي تريدها واكتب اول برنامج الك .. نشره على فيسبوك وخلي جماعتك يشوفونه مهما كان بسيط لا تخجل ابد، واني اول من رح يشجعك.

كلمات دليلية: basic ios objective c swift تعلم البرمجة