بسم الله الرحمن الرحيم
يمكن اكثر شي اقلقني هو التعامل مع النصوص في لغة البرمجه C# . ولا ابالغ ان قلت لكم ان الموضوع اخذ وقت طويل عشان استوعبه ، ولما استوعبته اكتشفت انه شي بسيط :D
السي شارب تتيح لك الكثير من الخصائص اللي تسهل لك الموضوع ، ومايحتاج تكتب اي شي ، بس تختار من الدروب ليست وانت تحتسي قدح القهوه .
نبدأ بأول الخواص المتاحه على الـ .NET "ملاحظه : الشرح على مشروع من نوع Web Form "
مثلاً عندنا مدخل من نوع string
string Example = "Hello world";
بس ياخي ماش ، انا ما ابيه يطبع لي Hello world كامله ، ابي اتفلسف شوي وافرد عضلاتي على الشباب بحيث انه يطبع لي مثلاً Hello لحالها
فيه خاصيه تساعدنا بهالموضوع ، اللي هي (SubString (startIndex , length.
startIndex = تعني من وين تبي تبدا تقطع الكلمه ، او بمعنى اخر الاندكس اللي تبي تبدأ منه . وهنا انتبه لأن العد راح يكون من الصفر ، يعني حرف H في بداية كلمه Hello مايعتبر الاندكس رقم 1 في الكلمه ، يعتبر الاندكس رقم صفر.
length = تعني وين تبي توقف الاقتطاع ، او بمعنى اخر الحرف رقم كم تبي توقف عنده . وهنا انتبه لأن العد راح يكون من الواحد ، يعني حرف O في اخر كلمه Hello راح يعتبر الحرف رقم 5 " جرب تعد الحروف ".
بيكون الكود بهذا الشكل :
Example.SubString (0 , 5)
طيب حلو ، انا الحين قطعت الكلمه وابي استعرضها عشان اشوف شغلي صح ولا لا . لو نجرب الان ، بنلقى ان الجمله زي ماهي . ما اقتطعت ولا صار لها شي .
هنا عاد يبدأ المبرمج الصغير الذي بداخلك يستائل ويقول حمود يلعب علينا :D
جرب انك تعرف متغير ثاني اسمه Example2 . وتسند له الامر السابق ، بيكون الشكل التالي :
string Example2 = Example.Substring (0, 5);
ممتاز ، حنا هنا رمينا الاقتطاع من الجمله Hello World لمتغير جديد . اطبع الـ Example2 والف مبروك ياحبيبي انت :D
طيب اذا ابي اطبع الكلمه الثانيه اللي هي World . خلنا نفكر فيها منطقياً ، هل فيه شي بعد كلمة World ؟ طبعاً لا ، يعني لو افترضت اني ارسلت له قيمه وحده في الـ Paramaters واللي راح تكون startIndex
البرنامج بيبدأ من الاندكس اللي انا اعطيته اياه وأكيد انه بيوقف عند نهاية الجمله
يعني بيكون الامر بهذا الشكل :
string Example2 = Example.Substring (5);
هنا انا قلت له ، ابدأ من الاندكس رقم خمسه اللي هو الفراغ - space ولا حددت له نهايه. البرنامج تلقائياً بيبدأ يقطع الى ان وصل اخر الجمله وتوقف.
الموضوع بسيط جداً ، وحبيت اني اشاركه معكم. اتمنى انه يكون واضح واي استفسار مرحب به هنا.
انا عطيتك مفتاح الموضوع والباقي عليك ، حاول انك تجرب في اكثر من مثال غير مثالي الخايس :D
في امان الله
لايوجد لديك حساب في عالم البرمجة؟
تحب تنضم لعالم البرمجة؟ وتنشئ عالمك الخاص، تنشر المقالات، الدورات، تشارك المبرمجين وتساعد الآخرين، اشترك الآن بخطوات يسيرة !